Клубну тюбю талачыкъда, Къобанны бойнунда уа, эт къазанла къайнай эдиле. Элни джамагъаты, тышындан чакъырылгъан къонакъла да «Бои без правил» деген спортдан дунияны 3 кере чемпиону Аджиланы Халитни джашы Расулгъа сый берирге келген эдиле бери. Расул 22 джылы джангы толгъан джаш адамды. Ёзге спортда джетишимлери барыбызны да къууандырырчадыла. Ол, 9 джылындан башлаб, тутуш бла кюрешиб келеди. Алгъа эркин тутушдан, ызы бла миллет тутушдан, артда дзюдодан, самбодан кёб эришиулеге къошулуб, алчы орунланы алгъанлай турады. Ол Шимал Кавказ федерал округну, Россияны, Европаны да талай кере чемпиону болгъанды. Озуб баргъан джылда Сочиде джумдурукъ тюйюш спортдан Евразияны кубогун алгъанды. Аны алтын медаль бла саугъалагъан эдиле. Кёб болмай дагъыда Сочи шахарда Чечен Республиканы президенти Рамзан Кадыровну ёчю ючюн баргъан эришиуледе да Расулну хорлагъан болмагъанды. Анга 1-чи ёч, 500 минг сом да, берилген эди.

Бу джол да Джангы джылны аллы бла Ярослав областны Переславль-Залесский шахарында «Бои без правил» тюйюшден Европаны кубогуна эришиуле болгъан эдиле. Ары 27 къралдан (Англиядан, Португалиядан, Болгариядан, СНГ-ны къралларындан, дагъыда башха джерледен)эм кючлюлени да кючлюлери, талай кере чемпион атны алгъан спортчу джашла келген эдиле. Ма ол эришиуледе да бизни Расул, 71 килограммда джумдурукъ тюйюшден кюч сынаргъа, амал кёргюзюрге чыгъыб, Европаны чемпиону болгъанды. Анга алтын медаль берилгенди. Дагъыда ол эришиуледе тренерлени айтханлары бла Россияны сыйын джакълар ючюн 2-чи кере да кюч сынаргъа чыгъады. Алай бла 75 килограммда да хорлаб, экинчи алтын медалны алады. Европа дараджада 2 кере алтын медаль алгъан джашха, машалла, дейбиз! Ол сёзлени ташкёпюрчюледен да кёбле айтадыла.

Элни администрациясыны тамадасы Къараланы Азрет, къууанч джыйылыуну ача, Расулну спортда джетишимлеринден хапар айтды. Спортчу джашлагъа болушханлагъа да сый бериб сёлешди. Эркин тутушдан дунияны, Европаны да талай кере чемпионлары, къарнашла Темрезланы Къурман, Науруз, Тохтар, миллет тутушдан белгили гёджебле Къараланы Шамил бла Тимурлан, джумдурукъ тюйюшден ёчлю орунланы алгъан Сюйюнбайланы Расул бла Рашид, чемпионла Ёртенланы Арсен бла Мунир, Шунгарланы Ислам, махтаулу тренерле Гюрджюланы Сагит, Лепшокъланы Абрек, Гаталаны Темирлан элни, республиканы, Россияны да атларын иги бла айтдырыб келедиле. Аланы санлары дагъыда кёб боллукъларына ийнанабыз.

Расулну сыйына аталгъан къууанч джыйылыуда элни афендиси Гочияланы Мухаммат хаджи, элчиледен Джантейланы Харшим, Хатуланы Борис, Москвадан адвокат Бостанланы Галина, Расулну анасы, Россияны Джигити Гербекланы Магометни къызы Фатима, дагъыда башхала сёлешдиле. Ташкёпюрчю джаш «Камос» корпорацияны директору Байрамукъланы Рустам, Расулну тенги Ёртенланы Мунир, аны къайын къызы Чомаланы Эльвира Расулгъа иги кесек ачха саугъа да бердиле. Аджиланы Расулну спорт джетишимлерине аталгъан быллай къууанч джыйылыу 2-чи кере болады. Биринчи джыйылыуда КъЧР-ни Президенти Эбзеланы Борис аны «Тойота» машина бла саугъалагъан эди. Бизни чемпион джашыбыз Аджиланы Расулгъа ётген огъур джыл болуб озду. Ол джангы юйдеги къурагъанды, спортда да уллу джетишимле этгенин айтдыкъ. Мындан ары да ол джашауундан, спортдан, ишлеринден къууансын!