Бу маулутну къарачай тилде Акъбайланы Окъубну джашы Исмаил (Чокуна эфенди) джарашдыргъанды.
Мухаммат файгъамбарны
туугъан хапары
Муслиманла, айтаим,
Сиз маулутха тынгылагъыз
Файгъамбарны хапарын
Башдан-аякъ ангылагъыз
Алгъын башлаб, айтаим
Болушлусун ал бурун,
Халкъдан алгъа джаратды
Файгъамбар боллукъ нюрюн.
Аны ючюн джаратды
Джети кёкню, джерлени,
Аны ючюн болдурду
Тишилени, эрлени.
Аллах мурат этгенди
Аны нюрюн джаяргъа,
Аны нюрю башлады
Бирден бирге таяргъа,-
Таза болгъан атадан
Сыйлы анагъа айланды,
Ата-ана ашхысы
Файгъамбаргъа сайланды.
Бир файгъамбар озмады
Китабында кёрмеин,
Аны бла къауумуна
Сюйюмчюлюк бермеин.
Бу сыфатда, бу джолда
Кёче-келе кетгенди,
Къурайишли Меккада
Абдулахха джетгенди
Аны нюрю атадан
Аминатха джетгенди,
Сыйлы болгъан ананы
Бууазлыгъы джетгенди
Файгъамбарла тюшюнде
Кёзюу-кёзюу келдиле,
Къарнындагъы джашындан
Сюйюмчюлюк бердиле…
Сенден сыйлы уллу Аллах
Бир къатынны кёрмеди,
Санга берген баланы
Бир къатынга бермеди.
Инша Аллах, къоркъма сен –
Рахатланыб джатарса,
Къарнынгдагъы туугъанлай,
Сен Мухаммат атарса.
Бууаз болуб анасы,
Эки ай тамам толгъанда,
Ёлдю атасы Абдуллах,
Мединагъа баргъанда.
Къайын атасы джюк болду
Аминатха къараргъа.
Аямаин кюрешди
Хар ишине джараргъа.
Аллах сюйген файгъамбарны
Тууар кёзюую джетгенди,
Аны табхан анасы
Кюченнгенлик этгенди.
Сыйлы болгъан мёлекле
Джан-джанындан чабдыла,
Башхаладан джашырыб,
Къанатларын джабдыла.
Мариям бла Асият
Мычымайын джетдиле,
Эки хур къыз келдиле,
Аначылыкъ этдиле.
Анасындан тууду ол,
Аурутмаин арытыб,
Бу дуниягъа чыкъды ол,
Толгъан айлай джарытыб.
Тууду таза джууулуб,
Тамам киндик кесилиб,
Кёзюне сюрме сюртюлюб,
Ариу сюннет этилиб,
Башын ёрге кёлтюрюб,
Къолун джерге джетдириб,
Кёзюн кёкге къаратыб,
Тилин тасбих этдириб.
Онекинчи баш кече
Рабигъулаууал айда
Тууду, къууанч кёб болду
Кёкде, джерде – хар къайда.
Аны нюрю джарытды
Кюн чыкъганны, батханны,
Сыйлы этди уллу Аллах
Аны бизге табханны.
Джети кёкде мёлекле
Мархабагъа турдула,
Андан сора шайтанны
Кёкден къоймай къуудула
Маула я салли уа салим
Даиман абада
Гъала хабибика
Хайрилхалкъи куллихим.
Маула я салли уа салим
Даиман абада
Гъала хабибика
Хайрилхалкъи куллихим.
Маула я салли уа салим
Даиман абада
Гъала хабибика
Хайрилхалкъи куллихим.
____________________________________________________________
Ёрге туруб айтылгъан джер
____________________________________________________________
Мархаба, я мархаба,
Ой, ахырат нюрюбюз,
Эсен келдинг, хош келдинг,
Халкдан сыйлы бийибиз.
Ол дуниягъа чыкгъанын
Джумлай гъалам билгенди,
Хар бир къайгъы тас болуб,
Уллу къууанч келгенди, -
Деди аланы хар бири,
Таууш этиб, - Мархаба,
Мархаба , я мархаба,
Бадишахим, мархаба.
Мархаба, я мархаба,
Кёз джарыгъым, мархаба,
Мархаба , я мархаба,
Джан тансыгъым, мархаба.
Мархаба , я мархаба,
Дуния уллусу, мархаба,
Мархаба , я мархаба,
Халкъ сыйлысы, мархаба.
Мархаба , я мархаба,
Сенсе халкъны тилеги,
Мархаба , я мархаба,
Сенсе халкъны сюйгени.
Мархаба , я мархаба,
Маулутунгу къургъанбыз,
Мархаба , я мархаба,
Сени аллынга тургъанбыз.
Къабыр азаб кёргюзмей,
Къабырлада джатдырлыкъ,
Гюнахланы кечдириб,
Джандетлени табдырлыкъ.
Мархаба , я мархаба,
Шафагъатынгы билебиз,
Мархабагъа биз туруб,
Сенден аны тилейбиз.»…
____________________________________________________________
Олтуруб айтылгъан джер
____________________________________________________________
Ол туугъанлай, джукланды
Маджус оту, джанмады,
Фарис сууу къуруду,
Бир тамчысы таммады…
Арсар болуб къалдыла
Кяфирланы башлары,
Умур-чумур болдула
Къуллукъ этген къачлары.
Къутулганлай, Аминат
Бир сюйюмчю джиберди:
- Келсин, кёрсюн атабыз, -
Аллах бизге джаш берди.
Абдул-Муталиб, барыб,
Джашын алыб кёргенди.
Хар кёргенин Аминат
Анга хапар бергенди.
Джашын алыб къойнуна
Кёб сёзлеге джетди ол.
Уллу Аллахха къууаныб,
Кёб шукурла этди ол.
Алты ай эмчек ичирди
Кеси анасы Аминат…
Тынгылагъыз, айтады
Сют анасы Халимат:
«Бану Сагъид атлыды
Биз джашагъан элибиз,
Джауум джаумай, кюн къысыб,
Къайгъылыды кёлюбюз.
Элибизни башлары
Джыйылдыла, толдула,
Къатын-киши къалмайын,
Оноу-кенгеш болдула.
Оноулары ол болду –
Биз Меккагъа бараикъ,
Къурайишли бийледен
Эмчек улан алайыкъ.
Берекетли тюйюлдю
Биз джашагъан элибиз,
Къурайишли бийледен
Берекетле кёрюрбюз.
Мен джетгинчи, хар бири
Эмчек улан алдыла.
Джеталмайын къалдынг, деб,
Манга къоркъуу салдыла.
Болалмадым алача
Мен кесими къураргъа,
Барыб кирдим мен элге
Эмчек улан сорургъа.
Бир себебсиз болмайды
Уллу Аллахны хар иши,
Мени аллыма джолукъду
Джарыкъ бетли бир киши.
Бир джанына бурулуб,
Манга ётерге къойду джол.
Абдуллахны атасы
Абдул-Муталиб эди ол.
Эмчек излегеними
Айтханымда мен анга,
Сиз сюйгенле - байла, деб,
Джууаб берди ол манга.
Менде барды бир ёксюз –
Уланымдан туугъанды,
Асырар болсанг, берейик,
Алты ай тамам болгъанды.
Айтды манга: «Къайт артха,
Мени бла барайыкъ,
Алыр болсанг, биз аны
Ишлерине къарайыкъ.
Къайтыб бардыкъ юйюне,
Мени сыйлы кёрдюле,
Дарийлеге бёлениб,
Джашны манга бердиле.
Джашны алгъанлай къойнума,
Кёзюн ачыб къарады,
Кёзлеринден нюр чыгъыб,
Джюрегиме джарады.
Айтхан эдим алагъа:
«Мен ызыма къайтайым,
Бу джашчыкъны болушлусун
Мен эриме айтайым»…
Барыб, айтдым эриме:
«Кел барайыкъ, кёреик,
Мен сюйгенлей сен сюйсенг,
Эмчек алыб келеик»
Эрим айтды, кёргенлей:
«Нек алмадынг муну сен,
Манга сормай алсанг да,
Разы боллукъ эдим мен».
Дженгил болду хар саным,
Аны эмчек алгъанлай,
Эмчеклерим къыздыла,
Аны аузуна салгъанлай.
Аны эмчек алгъынчы
Кеси джашим тоймаед,
Кече джатсам, орнумда
Кёз къысаргъа къоймаед.
Эмчек алыб тебредик,
Къабыл болуб тилекле,
Нёгерлеге джетишдик,
Рахат болуб джюрекле.
Нёгерлерим келдиле,
Джашны алыб кёрдюле,
Алгъыш этиб хар бири,
Джашны манга бердиле.
Къууанышыб барыбыз,
Эмчеклеге къабланыб,
Эшеклеге минишиб,
Джолубузгъа атланыб…
Баралмагъан эшегим
Барын озуб башлады,
Аны бла мингенлей,
Алгъын халын ташлады.
Аны эмчек алгъынчы,
Такъыр эди джашауум.
Ол юйюме киргенлей,
Эркин болду ашауум.
Аны нюрю бла мен
Бютюнледим джарыкъдан,
Бёлек къоюм бар эди,
Къарыусузла арыкъдан…
Къойларымы джыйдырыб,
Аны аллына элтдирдим,
Сыйлы болгъан къолларын
Сыртларына джетдирдим.
Арыкъ болгъан къойларым
Къалмай семиз болдула,
Къуруб тургъан джелинлери,
Къызыб, сютден толдула.
Бир табакъгъа аш салыб,
Анга ашатсам башындан,
Тоюучанед юйюрюм
Аны къалгъан ашындан.
Ол табакъны толтуруб,
Бирер-бирер бергенде,
Тоярмелле, деб, андан,
Кесим сынаб кёргенде
Ашаучанелле бирерин,
Бир затын да къоймайын,
Къалыучанелле къарашыб,
Биреринден тоймайын.
Джашларыма айтыучем:
«Мухамматны урмагъыз,
Мухамматдан алгъын сиз
Аш къатына турмагъыз»…
Кёзюуюне джетгенде
Джумушуму этерге,
Чыкъды бир кюн джаш бла
Къойчукъланы кютерге.
Чабыб келди джашчыгъым,
Бети сары, акъ болуб
Хахай этди ол манга.
Джыламукъдан кёз толуб.
Айтды манга: «Ой, анам,
Мухамматха джетиш сен,
Сау табарса аны деб,
Умут эталмайма мен».
Чабыб бардым мен анга,
Джюрегим бек таралыб,
Табхан эдим мен аны,
Кёзю кёкге аралыб.
Ол къырдышха олтурду,
Баргъанымы кёргенде,
Джюрегими джазды ол,
Манга айланыб кюлгенде.
Аман тюлдю джюрегим,
Аны алай кёргенде,
Рахат этди ол мени,
Айтыб хапар бергенде.
Айтды манга: «Ой анам,
Эки мёлек келдиле,
Къолларымдан тутдула,
Тюз сыртымдан джыкъдыла,
Джити бычакъ алдыла,
Джюрегими джардыла,
Аман къанын кетериб,
Джарыкъ нюрню салдыла.
Ёшюнюмю тикдиле,
Бир сагъатха сау этдиле,
Сен келгенни кёргенде,
Мени къоюб кетдиле»…
Аны кибик мен анда
Кёб аламат кёргенем,
Къоркъгъанымда, мен аны
Элтиб юйюне бергенем.
Хапар айтдым мен сизге,
Джюреклеге салыгъыз,
Салауатла кёб салыб,
Шафагъатын алыгъыз.
« Маула я салли уа салим
Даиман абада
Гъала хабибика
Хайрилхалкъи куллихим.
Маула я салли уа салим
Даиман абада
Гъала хабибика
Хайрилхалкъи куллихим.
Маула я салли уа салим
Даиман абада
Гъала хабибика
Хайрилхалкъи куллихим.
Набрала в электронном виде Магдиева Р.Х. по брошюре «Зикирле» , МП «Чолпан», 1991г.
|
