Ай, адамла, айтайым –
Джюреклеге алыгъыз
Шафагъатын эскериб
Салауатла салыгъыз.
Дуния уллусу Мухаммат
Алтмыш ючге джетгенди,
Джыламукъла тёгюгюз –
Ол дуниядан кетгенди.
Джууукъ болгъан заманда
Ол дуниядан кёчерге,
Аллах ийди келечи
Анга хапар этерге.
Келиб, айтды келечи,
«Мени Аллах ийгенди,
Сени сюйген уллу Аллах
Тансыкъ болуб излейди».
Бу хапарны билгенде,
Къайтыб кирди юйюне,
Тансыкъ болгъан Аллахны
Буйругъуна сюйюне.
Келиб юйюде тура эд
Аны къызы Фатимат,
Аны алай кёргенде,
Чабыб келди къатына:
«Атам, джаным, къалайды
Сени бюгюн халларынг,
Нек болгъанса сен былай,
Ауруймуду санларынг?»
«Мен не этейим, Фатимат,
Саным къызыб кюеди, -
Сюйюнюннген Аллахха
Джаным барыргъа сюеди»…
Бу хапарны эштгенлей,
Асхаблары джетдиле,
Тауаф этиб худжрасын,
Джылай-джылай кетдиле.
Билял эди хар эртден
Файгъамбаргъа келиучю,
Уяумуду, джукълаймыд –
Файгъамбарны билиучю.
Келиб айтды: «Ассалату
Я хабибу зулджалал».
Джууаб этди файгъамбар:
«Мен баралмам, ай, Билял,
Имам болсун Абубекир,
Энди бар да , хапар айт,
Анга уюсунла асхабла,
Заман болду, энди къайт»…
Билял деген, баш ачыб,
Джылай-джылай къайтханды,
Файгъамбарны айтханын
Асхаблагъа айтханды.
Абубекир турду ёрге,
Иманчылыкъ этерге,
Джыламайын чыдамад
Михрабха джетерге.
Джылау болуб межгитде,
Къычырыкъдан толгъанды.
Асхабланы тауушу
Файгъамбаргъа баргъанды.
«Тутугъуз мени, турайым,
Межгитиме барайым,
Асхаблагъа джетишиб,
Халларына къараим».
Ёрге туруб, барды ол
Асхабланы джанына,
Мыдах болуб, къарады
Асхабланы халына.
«Ёлюм мени айырса
Сизден,- деди Мухаммат,-
Асхабларым, этеме
Сизни Аллахха аманат.
Аны зикир этиб, сиз
Ол айтханны этигиз,
Иман бла, дин бла
Бу дуниядан кетигиз.
Джаханимден сюйсегиз
Узакъ болургъа саныгъыз,
Маулут этиб, сиз анга
Салауатла салыгъыз.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Былай айтыб, файгъамбар
Къайтды юйюне, орнуна.
Джылау болуб, Фатимат
Къадалгъанды бойнуна:
«Атам, джаным, ёлме сен,
Сени ючюн мен ёлейим,
Сен сау болуб, сени ючюн
Санга къурман болайым».
«Джаным, къызым, Фатимат,
Кёбдю, энди, джылама.
Кёзлеринги сууун сюрт,
Кёбдю, къызым, къыйналма.
Хасан бла Хусейин
Келсинле мени къатыма,
Хапар берчи алагъа,
Сюйген къызым Фатимат.
Ала бла сёлешиб,
Мен аланы кёрейим,
Къууанч болуб алагъа,
Мен джанымы берейим»…
Ала чабыб келдиле
Файгъамбарны джанына,
Аланы кёрюб, къууаныб,
Тынчлыкъ келди санына.
«Амал джокъмуд, атабыз,
Сен джаныгы бермезге?
Туумай къалсакъ ашхы эд,
Сени былай кёрмезге», -
Хасан бла Хусейин
Бу сёзлени айтдыла,
Джылай-джылай, экиси
Ызларына кайтдыла.
Былай эте тургъанлай,
Джабраил келгенди,
Уллу Аллахны саламын
Файгъамбаргъа бергенди:
«Сор, - дегенди уллу Аллах, -
Мен тилегин кёрейим,
Не тилесе файгъамбар,
Аны анга берейим».
«Умметими тилейме,
Айт Аллахха, къайт кери,
Олду мени тилегим
Туугъан кюнюмден бери».
Джабраил, къайтханлай,
Мычымайын терк келди,
Умметинги кечди деб,
Сюйюмчюлюк ол берди.
Хар бир гъалам къабырдан
Гъарасатха къайтханда,
Файгъамбарла хар бири
«Нафсым, нафсым» айтханда,
Файгъмбарым Мухаммат
«Уммет-уммет» дерикди,
Хар айтханын уллу Аллах
Ол кюн анга берликди.
Уммет этсенг сен анга,
Хитматынгы эт тамам,
Айт, джюрекни джылатыб:
«Ассалату уа ссалам»…
Сиз сюйсегиз джандетде
Рахат болургъа джаныгъыз,
Маулут этиб, сиз анга
Салауатла салыгъыз.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Файгъамбарым ишексиз
Кетеригин билгенди
Асхабларын кёрюрге
Джаны бла сюйгенди.
Асхаблары терк болуб,
Чабыб анга джетдиле,
Салам бериб, анга ала
Уллу хурмет этдиле.
Баян этди осият,
Асхаблагъа сёлешиб.
«Къууанайыкъ, - деди ол, -
Джарыкъ бетден тюбешиб.
Хасан бла Хусейин,
Джандан сюйген балала…
Хасан бла Хусейин
Фатиматха къалалла.
Келтиригиз джашланы,
Тобугъума салыгъыз:
Джандетледе кёрейик,
Сау-саламат къалыгъыз.
Чакъырыгъыз Билялны,
Келсин мени къатыма,
Анга джюкню джюклетиб,
Кёб миннгенме атыма.
Сёлешигиз, айтыгъыз,
Разылыгъын алыгъыз,
Айшат бла Фатимат,
Сау- саламат къалыгъыз.
Билял салах къычырсын,
Халкъгъа хапар берирге,
Асхабларым джыйылыб
Джаназыма келирге.
Фазлий къуйсун суууму,
Алий джуусун санымы,
Узаймайын береме
Бир Аллахха джанымы.
Абубекирни аллына
Джиназымы салыгъыз,
Асхабларым, барыгъыз
Сау-саламат къалыгъыз.
Джанны берген излейды,
Мен кесине берейим,
Умметлерим, мен сизни
Джандетледе кёрейим.
Сиз сюйсегиз къалмайын
Джандетлеге барыргъа,
Ашыгъыгъыз, унутмай
Салауатла салыргъа.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим».
Бу сёзледе тургъанлай,
Бир къычырыкъ келгенди,
Гъазраил болгъанын
Ол Мухаммат билгенди.
«Манга изин бармыды
Юйюгюзге кирирге,
Ол нюр болуб джарытхан
Бетигизни кёрюрге?»…
«Ауруйд сыйлы файгъамбар, -
Деди анга Фатимат, -
Изин санга табылмаз
Кирирге аны къатына.
Биз турабыз къатында,
Аны халын сынашыб,
Бар ишинге, къарнашым,
Биз турабыз джылашыб»…
Дагъыда бир къычырды:
«Мен кеталмам кёрмейин,
Сюйюнюннген затны алыб
Сюйгенине бермеин»…
«Кимди, билмейме, я атам,
Сени кёрмей кетмейди.
Къайт, деб анга мен айтсам,
Айтханымы этмейди»…
«Джан алыучу Гъазраил
Олду, къызым, Фатимат,
Сен тыймачи, келме къой,
Келсин мени къатыма.
Ана бла атаны,
Эгеч, къарнаш, баланы,
Айырыучу, къоймаучу…
Бир-биринден аланы…
Олду сыйсыз этдирген,
Джанын алыб, санланы,
Ата-ана ёлтюрюб,
Ёксюз этген баланы»…
Эшик ачды, кел, деди
Гъазраилге Фатимат.
Кириб келди Гъазраил
Файгъамбарны къатына.
«Келгенмисе сен манга,
Зияратымы этерге?
Огъай болса, келдингми
Джанымы алыб, кетерге?»
«Мен келгенме, буюрсанг,
Джанынгы алыб кетерге,
Зияратынгы битдириб,
Сен айтханны этерге»…
«Мен айтханны сен этсенг,
Сыйлы къонакъ мёлегим,
Умметими джасыкъсын,
Олду сенден тилегим»…
Уллу Аллахдан ол заман
Анга таууш джетгенди,
Хар тилекни уллу Аллах
Анга къабыл этгенди.
Асхаблагъа билдирди
Хар бир затны тамамын.
Айтыгъыз деб, буюрду
Умметлеге саламын.
«Сумметими тутсунла
Джандан сюйген умметим.
Ала ючюн хазырды
Шафагъатым, джандетим», -
Былай айтыб, файгъамбар
Джанын берди Аллахха,
Уммет этген бизни анга
Шукур болсун Аллахха.
Сиз сюйсегиз, умметле,
Шафагъатын алыргъа,
Керек болад хар заман
Салауатла салыргъа.
Джыламукъла сиз тёгюб,
Салауатла салыгъыз,
Осиятын сиз тутуб,
Разылыгъын алагъыз.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Маула я салли уа саллим
Даиман абада
Гъала хабибика
Хайрилхалкъи куллихим.
Набрала в электронном виде Магдиева Р.Х. по брошюре «Зикирле» , МП «Чолпан», 1991г,
|
